Tuesday, September 18, 2007

ആരെയും കാണാനില്ല - ദേശമംഗലം രാമകൃഷ്ണന്‍

രണ്ടു വാതിലുകളാണവന്‍
കണ്ണുകളല്ല, കാതുകലല്ല, മൂക്കിന്‍ തുളകളല്ല

ചിത്രമാവുന്ന ചുമരല്ല
വാനത്തിലേയ്ക്കുള്ള കോണിയല്ല
പീഠത്തിനുള്ള ഉമ്മറമല്ല
കുഞ്ഞിക്കാലിന്റെ മുറ്റമല്ല
രണ്ടു വാതിലുകളാണവന്‍

ആവശ്യക്കാര്‍ വരുമ്പോള്‍ നില്‍ക്കുന്നു അവന്‍
ഒരു വാതില്‍ തുറക്കുന്നു
മറ്റേ വാതില്‍ അടയ്ക്കുന്നു
അവര്‍ പറയുന്നു നല്ല വീടു നീ നിന്നെ മാത്രം കാണുന്നില്ല
അതൊരു കുറവല്ല.

ഉമ്മറപ്പടി കടന്ന് അവര്‍ അകത്തേയ്ക്ക് കേറുന്നു
എപ്പഴാ വന്നത്, നന്നായി
എന്നാരോ സ്വാഗതം പറയുന്നു
ആരെയും കാണാനില്ല
അതൊരു കുറവല്ല

തിരിഞ്ഞു നോക്കേണ്ട അടഞ്ഞ വാതില്‍ക്കല്‍
ദുര്‍മണങ്ങള്‍ കെട്ടിയാര്‍ക്കുന്നു
ചില പഴകിയ കൊടിക്കൂറകള്‍
എങ്കിലും തിരിച്ചു പോരുമ്പോള്‍ കാണാതിരിക്കാനാവില്ല
തുറന്ന വാതില്‍പ്പാളിയില്‍
ചോരപ്പശയിലൊട്ടി നില്‍ക്കുന്നു
അഞ്ചു വിരലുകള്‍

അവന്‍ ഇല്ലെന്നും വെറും രണ്ടു വാതിലേയുള്ളൂവെന്നും
ആള്‍ക്കാര്‍ പറയാറുണ്ട്
എങ്കിലും മൂഢമാം ചില നേരങ്ങളില്‍
കേള്‍ക്കുന്നു ഈ വാതില്‍ക്കല്‍
ആരോ വിരല്‍ ഞൊടിക്കുന്നു
ആരെയും കാണാനില്ല

No comments: