അന്നത്തെ ഏകാന്തത - സത്യചന്ദ്രന്‍ പൊയില്‍ക്കാവ്

അന്നത്തെ ഏകാന്തത

ലിംഗദൌത്യങ്ങളറിയാതെ നാട്ടുമാവിനു ചുവട്ടില്‍
അച്ഛനുമമ്മയും കളിച്ചിരുന്നു പണ്ടു നമ്മള്‍

ഒരു ചിരട്ട വലിച്ചെറിഞ്ഞ്
ഒറ്റമുലച്ചിയായി നിന്നിരുന്നു
അടിവസ്ത്രങ്ങളിലന്ന്
ആകാശത്തിന്
നീലനിറമായിരുന്നന്ന്
കായലും കയറും കണ്ട്
എത്രവൈകിയാണന്ന്
നിന്റെ അച്ഛനുമമ്മയും വന്നത്
എന്നിട്ടും
ചീത്തയായില്ല നാം
അന്നത്തെ ഏകാന്തതയില്‍.

പുറം കടലും കല്ലായിപ്പുഴയും

പുകനൂലുകള്‍ കുപ്പായം തുന്നുന്ന
വയനാട്ടില്‍ നിന്നും
ഒരു മഞ്ഞുകാലത്താണ്
സോളമന്റെ ഗീതങ്ങളുമായി
അവള്‍ വന്നത്
പലയിടങ്ങളോടും പടവെട്ടി
അവള്‍ ഉണ്ണിയാര്‍ച്ചയായി
എന്നാല്‍
സാമൂതിരിമാരുടെ നാട്ടില്‍
പുറം കടലുകള്‍ അവളെ വലവീശി
വറ്റല്‍ മുളകിന്റെ മണമുള്ള നട്ടുച്ചകള്‍
അവളെ പങ്കിട്ടു
അന്ന് കിടന്ന കിടപ്പാണ്
കല്ലായിപ്പുഴ.